Ngurrimi i Lëvizjes Socialiste për Integrim, vazhdon të mbaje peng ligjin e mbetjeve. Teksa Kuvendi ka shkelur rregulloren duke mos marrë në shqyrtim brenda 8 javëve dekretin e Presidentit, që rrëzon këtë ligj, kryetari i Kuvendit Ilir Meta, gjatë nënshkrimit të një marrëveshje në rektoratin e Universitetit te Tiranes u shpreh se ligji ka nevojë për me shumë konsultime.
Ai pranoi se votimi i ligjit, ishte i nxituar për shkak të një vullneti politik të papërgjegjshëm dhe mungesës se njohurive.
Ilir Meta, Kryetar i Kuvendit: Shpeshherë vendimmarrjet kanë qenë edhe të nxituara, jo vetëm për shkak ndoshta ndonjëherë të vullnetit politik jo shumë të përgjegjshëm dhe të përmbajtur, por edhe për shkak të mungesës së njohurive të duhura në fusha të caktuara. Ne po e vëmë re, për shembull sa i takon çështjes së mjedisit apo çështjes së mbetjeve, sa i nevojshëm e i domosdoshëm është paraprija e vendimmarrjes nga studime, nga debate, nga kërkime, pasi janë disa fusha mjaft të reja ku edhe ata të cilët japin mësim shpesh kanë nevojë të azhornohen dhe jo më deputetët, ku dihet që ende Kuvendi ynë lë për të dëshiruar sa i takon cilësisë së përfaqësimit të drejtpërdrejtë.
Lëvizja Socialiste për Integrim e votoi ligjin e mbetjeve, i cili mori 63 vota ne total. Por pas protestave të Shoqërisë Civile dhe refuzimit nga Presidenti, drejtues të saj deklaruan në takime me përfaqësues të Shoqërisë Civile se nuk do ta votoje sërish. Vota e LSI duket se mban peng edhe shqyrtimin e dekretit të Presidentit.
