Senati i shtetit të Nju York-ut po shyqyrton një projektligj që do të dënojë me gjoba nga 25 deri në 250 dollarë, njerëzit që përdorin pajisje elektronike, si smartphone, tableta e të tjera në momentin që kalojnë rrugën ose një kryqëzim.
Sipas statistikave, në metropolin e madh amerikan, çdo vit humbin jetën 300 këmbësorë, të cilët aksidentohen nga makinat. Ekspertët bëjnë me dije që një prej shkaqeve kryesore është përdorimi i tepruar i celularëve, dhe lundrimi në internet.
Të përjashtuar nga ky ligj do të jenë vetëm mjekët, pasi ata përballen me urgjenca të ndryshme dhe duhet t’u përgjigjen telefonatave në çdo vend dhe çast.
Nju Jorku nuk është vendi i parë në Amerikë ku zbatohet një rregullore e tillë. Në vitin 2017 ky ligj u miratua në Honolulu, dhe u cilësua si “ligji i këmbësorit të hutuar”./Opinion.al
