Ambasadori i Bashkimit Europian në Tiranë, Luigi Soreca është shprehur sot se ndryshimet në ligjin antishpifje duhet të jenë në përputhje me rekomandimet e Komisionit të Venecias.
Në një status në Twitter ai thekson se BE është duke e ndjekur këtë çështje dhe kërkon nga institucionet që të kryejnë konsultimet e duhura me përfaqësuesit e mediave dhe shoqërinë civile para bërjes së ndryshimeve në ligj.
“Çdo amendim në draftin e ligjit antishpifje duhet të jetë në përputhje me rekomandimet e bëra nga Komisioni i Venecias mbi këtë çështje. Autoritetet shqiptare janë zotuar që të vijojnë të punojnë me këtë ligj për të adresuar të gjitha problemet e nënvizuara nga opinioni i Komisionit të Venecias. Ne kemi mbajtur shënim deklaratën e bërë dje nga shumica qeverisëse se do të ndjekë këto rekomandime dhe se konsultimet e duhura do të ndërmerren. Ne inkurajojmë autoritetet të ndërmarrin konsultimet e nevojshme me organizatat mediatike dhe shoqërinë civile duke marrë parasysh pikëpamjet e shprehura nga organizatat kombëtare dhe ndërkombëtare të mediave. Ne do të vazhdojmë të ndjekim nga afër zhvillimet në lidhje me këtë legjislacion të rëndësishëm, në mënyrë që paketa të vihet në përputhje me të gjitha standardet përkatëse ndërkombëtare dhe evropiane.”, shkruan Soreca.
Any amendments to the draft #antidefamation law should be in line with the recommendations made by the @VeniceComm (VC) on the matter. The #Albanian?? authorities have committed to continue working on this law to address all the issues outlined in the VC Opinion. We take..1/3
— Luigi Soreca?? (@LSorecaEU) September 17, 2020
.. taking into account the views expressed by national & international media organisations. We will continue to follow very closely developments regarding this important legislation, so that the package is brought into line with all relevant international & European standards.3/3
— Luigi Soreca?? (@LSorecaEU) September 17, 2020
Në raportin e tij final për ligjin antishpifje, Komisioni i Venecias u shpreh se ai ishte i pazbatueshëm dhe se kishte problematika në formulim dhe në koncept.
Komisioni ngre dyshime të thella për pavarësinë e Autotitetit të Mediave Audiovizive (AMA) dhe pohon se dhënia e kompetencave të zgjeruara cenon lirinë e medias.
Komisioni argumenton se procedura ligjore për kundërshtimin e vendimeve të dyshimta të AMA-s nuk ofron garanci të mjaftueshme mbrojtëse, pasi vendimet e saj kanë efekt të menjëhershëm.
Opinioni sqaron më tej se kapaciteti ekonomik i një portali online nuk merret parasysh nga AMA në rastin e gjobave, duke çuar në një situatë ku “media të vogla të paralizohen nga gjoba joproporcionale”.
Venecia kritikon dhe parashikimet ligjore të cilat nuk garantojnë pezullim të gjobave ndaj mediave online në rast ankimimi në gjykatë.
Në lidhje me regjistrimin e portaleve tek AMA, Venecia e konsideron në kundërshtim me standardet ndërkombëtare dhe një mjet joefikas.
Në përfundim, Komisioni i Venecias mbështet idenë e “krijimi të një institucioni vetërregullues, që funksionon në mënyrë efektive dhe përfshin të gjithë aktorët përkatës në fushën e mediave.”
Megjithë vërejtjet e Venecias, kryeministri Rama ka deklaruar se do ta çojë përpara ligjin me gjithë ndryshimet e kërkuara. /Opinion.al
