Dje, media të ndryshme online kanë nxituar të shkruajnë për një lidhje të sulmuesit të kombëtares shqiptare, autorit të golit historik ndaj Rumanisë, Armando Sadiku, me vajzën e asistentit kuqezi, Paolo Tramezzani. Në fakt, për një gazetar sportiv, kjo gjë ishte e pabesueshme, por ndonjëherë “fjala e keqe merr dhenë”, sikurse thotë një fjalë popullore. “Fjalë e keqe” është konsideruar nga vetë Sadiku, që ka reaguar, duke e konsideruar këtë gjë si diçka dashakeqe ndaj tij.
Vajza e Tramezzanit është e fejuar prej dy vitesh, ndaj ky lajm ka prekur edhe ndihmësin e De Biazit, që ndodhet me kombëtaren në Francë. Ndoshta për pak klikime më shumë, disa portale kanë tejkaluar cakun, duke shpikur diçka krejtësisht të pavërtetë. Përmes rrjeteve sociale, faqeve të tij në to, Armando Sadiku ka bërë këtë sqarim në lidhje me të tillë zëra: “Të dashur miq, do të doja që bukuria e fitores me Rumaninë të mos zbehet dhe të keqinterpretohet nga një foto krejtësisht e pafajshme dhe miqësore, që ka qarkulluar nëpër media ditëve të fundit.
Ju lutem mos aludoni për asgjë dhe mos shkruani gjëra të pavërteta për jetën time personale jashtë fushës së futbollit. Dua të theksoj se arritjet e mia kanë vetëm një emërues të përbashkët: punë dhe sakrifica pa fund dhe besimin tek Zoti, nga ana ime dhe e familjes time të shtrenjtë, që gjithmonë ka qenë mbështetja dhe frymëzimi im. Faleminderit, Armando Sadiku!”
Në foto zv. trajneri i Shqipërisë Paolo Tramezzani me të bijën Desiree
Në foto Desiree Tramezzani me shokun e saj
