Figura më e spikatur e opozitës në Rusi, Alexei Navalny është dërguar me urgjencë nga burgu në një spital në Moskë.
Mjekët nuk kanë dhënë informacione për gjendjen e tij por zëdhënësja e Navalnyt tha se ai kishte patur një reaksion alergjik të rëndë, gjë e cila sipas saj nuk i kishte ndodhur kurrë.
Në një postim në Twitter, zëdhënësja Kira Yarmush shkruan se lideri i opozitës nuk ka patur kurrë një reaksion alergjik. Ajo shton gjithashtu se ai po merr ndihmën e nevojshme në spital nën ruajtjen e policëve.
Navalny u dënua me 30 ditë burg javën e kaluar pasi thirri një protestë të shtunën për të cilën nuk kishte marrë leje në organet zyrtare.
Më shumë se 1 mijë persona u arrestuan nga policia gjatë demonstratës kundër mos lejimit të regjistrimit të kandidatëve të opozitës në zgjedhjet e ardhshme në Rusi.
Navalny u bë i njohur në Rusi si një aktivist kundër korrupsionit, i cili udhëhoqi protestat më të mëdha në vend kundër presidentit Vladimir Putin gjatë dimrit të vitit 2011.
Ai është burgosur vazhdimisht, zakonisht për përfshirjen e tij në demonstrata të paautorizuara, por gjithashtu (në rigjykim në vitin 2017) për përvetësim në një rast që ai thotë se ishte një farsë
Dënimi i tij për mashtrim e pengoi atë të kandidonte kundër Putinit në zgjedhjet presidenciale të vitit 2018.
Në vitin 2015 në qendër të Moskës u vra lideri i opozitës ruse, Boris Nemtsov. Kjo është një ngjarje që edhe sot ka shumë pikëpyetje megjithëse autoritetet identifikuan dy autorë, njëri prejt të cilëve kreu vetëvrasje.
Përkeqësimi i shëndetit të Navalnyt nga një sëmundje nga e cila ai nuk vuan dhe në prag të zgjedhjeve në Rusi ngre pikëpyetje dhe frikë për të ardhmen e tij. /Opinion.al
