Kryetari i Partisë Demokracia e Re në Greqi, Kyriakos Mitsotakis, ka folur për marrëdhëniet e Shqipërisë me Greqinë nëse ai arrin të fitojë zgjedhjet e përgjithshme të 7 korrikut.
Në dy intervista televizive të 24 orëve të fundit, Mitsotakis ka përsëritur pothuajse të njejtin kërcënim: Nëse nuk respekton me vepra të drejtat e minoritetit, Shqipëria nuk do të ketë të ardhme europiane.
“Dua ta them edhe tek ky emision dhe ta dëgjojnë mirë edhe në Tiranë se ecuria europiane e Shqipërisë nuk do të ketë asnjë të ardhme nëse Shqipëria nuk respekton me vepra të drejtat e minoritetit kombëtar grek”, tha Mitsotakis.
Një ditë më parë ai kishte paralajmëruar qeverinë e Tiranës se ndaj Shqipërisë do të ketë sanksione në rrugën europiane por edhe në marrëdhëniet bilaterale.
“Mesazhi që kam çuar tek qeveria shqiptare është tepër i qartë, do të ketë sanksione dhe pasoja ne se nuk respektohen të drejtat e minoritetit kombëtar grek dhe kjo nuk ka lidhje vetëm me anëtarësimin e Shqipërisë në BE, por edhe me marrëdhëniet dypalëshe. Z. Rama duhet të kuptojë se në se kërkon marrëdhënie të mira duhet të respektojë të drejtat e minoritetit grek”, tha lideri i Demokracisë së Re. /Opinion.al
