Lideri çeçen, Ramzan Kadyrov, njëkohësisht aleat i ngushtë i Kremlinit, ka bërë thirrje që të marrë fund konflikti aktual mes Izraelit dhe Hamasit. Ai thotë se mbështet plotësisht veprimet e Palestinës ndërsa shton se kjo luftë nuk do të përfundojë aq lehtë.
Në një mesazh në telegram Kadyrov thotë: Ne mbështesim plotësisht veprimet e Palestinës, sepse Izraeli mori tokën e tyre dhe tani po i mban të izoluar. Ata nuk e kanë lirinë e fjalës. Sot unë e kundërshtoj luftën dhe po u bëj thirrje të gjithëve t’i japin fund kësaj lufte, për të parandaluar përhapjen e saj në të gjithë. Kjo luftë nuk do të përfundojë aq lehtë.
Më tej ai thotë na dërgoni atje në një mision paqëruajtës dhe të vendosim kush ka të drejtë dhe kush ka gabim.
“Unë po u bëj thirrje edhe një herë të gjithë muslimanëve, të gjithë qytetarëve dhe shtetit tonë që të mbështesin të vërtetën dhe t’i japin fund kësaj lufte. Ose na dërgoni atje në një mision paqeruajtës. Ne do të vendosim se kush ka të drejtë dhe kush ka gabim”, përfundon Kadyrov.
