Lideri republikës ruse të Çeçenisë, Ramzan Kadyrov tha sot se është gati të shpallet “në gjak” me senatorin e republikës ruse të Dagestanit, Suleyman Kerimov dhe me dy deputetë të Dumës ruse, prej një komploti vrasjeje që akuzon po tentonin ndaj tij.
Në një postim në rrjetin Telegram, Kadyrov zbulonte dje se kishte mbajtur një takim me krerët e sigurisë së Çeçenisë për çështjen. Ai postonte një video rreth nëntë minuta të gjatë me sekuenca nga takimi ku fliste me zyrtarët në gjuhën çeçene.
Agjencia ruse TASS shkruante se Kadyrov kishte përmendur senatorin Kerimov, dhe deputetët e parlamentit të Moskës, Bekhan Barakhoev e Rizvan Kurbanov, në kontesktin e incidetit me dy të vrarë në zyrat e korporatës ruse Wildberries disa javë më parë në Moskë.
Në video, Kadyrov i referohet personave të sipërpermendur në kontekstin e incidentit, por jo drejtpërdrejt kompanisë Wildberries, shkruan rrjeti ukrainas UAWire.
“Nëse ata nuk provojnë të kundërtën, unë deklarohem në konflikt gjaku me Barakhoev, Suleyman Kerimov, e Rizvan Kurbanov. Ka dëshmitarë dhe njerëz me të cilët ata kanë kontaktuar, që i kanë pyetur sa para kërkojnë për të më vrarë,” citonte agjencia ruse TASS liderin çeçen.
Në lidhje me incidentin e rëndë në zyrat e biznesit Wildberries në Moskë, Kadyrov përmendte Kerimov, duke thënë: “Ishte një situatë biznesi. Bekhan Barakhoev ishte aty, Suleyman Kerimov ishte aty, si dhe Rizvan Kurbanov. Ata kanë punën e tyre, nuk e di nëse po i merrnin biznesin një gruaje, ata kanë urdhëruar të më vrasin”, sipas përkthimit të rrjetit Agentsvo.
Kadyrov shton më tej për incidentin me dy roje të vrara në zyrat e Wildberries: “Disa njerëz po mundohen t’i japin ngjarjes nuanca kombëtare, duke nënkuptuar se janë njerëz të Kadyrov. Unë ju sugjeroj të mos gënjeheni me këto, nëse dikush ka një problem me njerëzit e Kadyrov, le të vijë drejtpërdrejt te unë”.
Përplasja e rëndë në zyrat e Wildberries në qendër të Moskës ndodhi më 18 shtator, ku Vladislav Bakalchuk, bashkëshorti i themelueses së kompanisë i ardhur për një takim biznesi i shoqëruar nga njerëz të ministrisë brendshme ruse, hapi zjarr duke lënë dy roje të vrarë dhe disa te plagosur.
Wildberries tha asokohe në një njoftim se njerëz të armatosur që po shoqëronin Vladislav Bakalchuk, bashkëshortin e ndare të pronares Tatyana Bakalchuk, hynë ilegalisht në zyrat e kompanisë në qendër të Moksës dhe hapën zjarr.
