Si sot 20 vjet më parë Serbia nënshkroi në Kumanovë kapitullimin e saj në luftën ndaj Kosovës. Kjo ngjarje historike i hapi rrugë paqes në Kosovë dhe i dha fund gjenocidit që po ushtrohej mbi popullsinë. Presidenti i Kosovës, Hashim Thaci, Kryeministri Ramush Haradinaj dhe Kryetari i Kuvendit Kadri Veseli kanë përkujtuar këtë 20 vjetor në Facebook.
“Çlirim, fund i gjenocidit, paqe dhe fillim i jetës së re në liri dhe barazi për ne” e quajti këtë marrëveshje Presidenti Thaci. Ai përshëndeti gjithashtu forcat e NATO-s për ndërhyrjen e tyre vendimtare në përfundimin e konfliktit të armatosur. Thaci gjithashtu përkujtoi edhe ata që dhanë jetën që kjo marrëveshje të merrte jetë.
Në të njëjtën frymë respekti dhe patriotizmi reagoi dhe Kryeministri Haradinaj. “Sot, 20 vjet më parë në Kumanovë u nënshkrua marrëveshja e cila përfundimisht i dha vulën të drejtës tonë për të jetuar në liri” shkroi ai në Facebook ku dhe nderoi të rënët në luftën e zhvilluar në Kosovë.
Ca më patriotik ishte reagimi i Kadri Veselit për këtë përvjetor. “Si sot 20 vjet më parë, në Kumanovë, Serbia u gjunjëzua, duke nënshkruar kapitullimin përfundimtar në luftën e Kosovës. Pas 1 shekulli sakrifice e vuajtje të popullit tonë, ëndrra e madhe e lirisë po bëhej realitet” shkruan Veseli.
Me marrëveshjen e Kumanovës, Serbia është detyruar të tërheqë të gjitha forcat e saj policore dhe ushtarake nga Kosova. Marrëveshja është arritur pas fushatës së bombardimeve të NATO-s mbi Serbi, e cila ka zgjatur për 78 ditë me radhë, si dhe pas përpjekjeve të ndryshme diplomatike për t’i dhënë fund luftës në Kosovë, gjatë të cilës mbi 10 mijë njerëz janë vrarë, rreth 5 mijë të tjerë të zhdukur dhe mbi 1 milion shqiptar të zhvendosur. Shkatërrimet materiale po ashtu kanë qenë masive.
Më 12 qershor të vitit 1999, në Kosovë kanë zbarkuar trupat e para të këmbësorisë së NATO-s, ndërsa ka nisur largimi i forcave serbe.
Në të njëjtën kohë, është shpërbërë edhe Ushtria Çlirimtare e Kosovës, për t’u shndërruar në Trupat Mbrojtëse të Kosovës. /Opinion.al
