Sot i jepet lamtumira ish-presidentit francez, Jacques Chirac, i cili ka ndërruar jetë javën e shkuar në moshën 86-vjeçare. E hëna është shpallur ditë zie kombëtare në Francë dhe në institucionet publike dhe shkolla, u mbajt një minutë heshtje.
Rreth 30 lider botëror, mes tyre dhe presidenti rus, Vladimir Putin, presidenti gjerman, Frank-Walter Steinmeier, kryeministri libanez, Saad al-Hariri dhe presidenti i Komisionit Evropian, Jean-Claude Juncker janë mbledhur në Paris, në kishën “Saint-Sulpice” për funeralin e Chirac.
Më vonë gjatë ditës, presidenti francez, Emmanuel Macron njoftoi se do të organizojë një drekë për ta në Pallatin Elysee.
Në ceremoni janë planifikuar nderime ushtarake në qendër të Parisit, ndërsa është konfirmuar se 86-vjeçari do të varrohet së varrezat “Montparnasse” në jug të Parisit, pranë vajzës Laurence, e cila vdiq në vitin 2016, në moshën 58-vjeçare, pas një beteje me anoreksinë.
Gjatë një karrierë që vazhdoi për dekada në krahun e djathtë të politikës franceze, Chirac mbajti dy herë postin e Kryeministrit para se të shërbente si kreu i shtetit në periudhën 1995-2007. Ai është nderuar nga shumë francezë për rolin e tij në Francë por edhe botë, duke kundërshtuar ndërhyrjen në Irak më 2003./Opinion.al
