Një vrasje ka ndodhur sot në Lezhë, brenda një parukerie dhe viktima është pronarja e biznesit, 28-vjeçarja Etleva Ndoka (foto).
Dinakima
Mesditën e sotme, 31-vjeçari Alfred Nikolli, ka hyrë në sallonin e bukurisë së gruas dhe e ka qëlluar me armë zjarri, ndërkohë që ajo ishte në prani të një klienteje. Raportohet se shkaku i ngjarjes ka qenë xhelozia e Nikollit, me të cilin, e reja e martuar dhe me një fëmijë, dyshohet se kishte një lidhje jashtëmartesore. Ndërkohë, autori nuk ishte i martuar.
Viktima është qëlluar me dy plumba. Më pas, Nikolli është larguar me shpejtësi, por është vënë në pranga disa orë më pas, në një zone rurale të Mirditës. 28-vjeçarja është transportuar në spital nga persona që pasi dëgjuan të shtënat shkuan në sallonin e saj. Ajo u transportua për në spital, ku nuk arriti të mbijetojë, pasi mësohet se kishte marrë dy plumba në zemër.
Raportohet se autori i dyshuar dhe viktima ishin me orgjinë nga i njëjti fshat, Spite, dhe njiheshin me njëri-tjetrin prej kohësh.
Shkaku
“Të afërmit e viktimës thanë jashtë kamerës se, e reja ka pasur më herët një lidhje jashtëmartesore me 31-vjeçarin. Po të njëjtat burime rrëfejnë se prej një viti, Etleva kishte shkëputur çdo lloj lidhje me 31-vjeçarin, por ky i fundit nuk e ka pranuar një gjë të tillë. Viktima dhe autori, sipas këtyre burimeve, janë konfliktuar më herët dhe 28-vjeçarja ka bërë denoncim në polici ndaj Nikollit”, raporton News 24. Megjithatë, kjo nuk është konfirmuar zyrtarisht nga policia.
“Etleva Ndoka, nënë e një fëmije të mitur, e martuar akuzohej nga Alfred Nikolli se kishte një lidhje tjetër të tretë”, raporton Report Tv, që shton se “sipas burimeve, Nikolli kishte financuar biznesin e Ndokës dhe kishte kontribuar deri në blerjen e mobiljeve të parukerisë sallon bukurie, ‘Eva’. Nga të dhënat mësohet se Etleva Ndoka kishte një lidhje tjetër për të cilën Alfred Nikolli ishte ndjerë tepër xheloz kohët e fundit. Kjo besohet si shkaku kryesor i vrasjes së 28-vjeçares ditën e sotme në Lezhë”.
