Në Lezhë ka nisur zyrtarisht shpërndarja e materialeve zgjedhore në KZAZ nr. 13, në kuadër të procesit të votimit që do të zhvillohet më 11 maj.
Gazetari i Klan News Martin Marku raporton se procesi ka nisur në oren 11:30 dhe po zhvillohet sipas një plani të detajuar të hartuar nga Komisioni i Zonës së Administrimit Zgjedhor, me qëllim garantimin e një organizimi sa më efikas dhe të sigurt.
Të parët që kanë marrë në dorëzim materialet zgjedhore janë përfaqësuesit e qendrave të votimit të njësisë administrative Ungrej, e cila është zona më e largët gjeografikisht në territorin e bashkisë Lezhë. Për shkak të distancës dhe terrenit të vështirë, shpërndarja në këtë zonë është konsideruar prioritet për t’u siguruar që të gjitha qendrat të jenë të pajisura në kohë me materialet e nevojshme për zhvillimin normal të votimit.
Materialet zgjedhore, përfshirë fletët e votimit, listat e zgjedhësve, procesverbalet dhe pajisjet ndihmëse, po shoqërohen në çdo moment nga forcat e Policisë së Shtetit, në kuadër të masave të shtuara të sigurisë për të garantuar integritetin dhe mbarëvajtjen e procesit.
Shpërndarja e materialeve do të vijojë gjatë gjithë ditës, sipas orareve të përcaktuara më herët nga KZAZ, duke u bërë në mënyrë të koordinuar nga sekretarët dhe anëtarët e komisioneve zgjedhore përkatëse për secilën qendër votimi.
Autoritetet lokale dhe strukturat zgjedhore kanë konfirmuar se gjithçka po ecën sipas planifikimit dhe janë të angazhuara maksimalisht për të siguruar një proces transparent, të rregullt dhe të besueshëm për të gjithë qytetarët e Lezhës.
Klan News
