Katër persona janë arrestuar nga policia në Lezhë, pasi akuzohen për veprimtari kriminale në fushën e kultivimit të bimëve narkotike.
Sipas policisë pas një hetimi 3-mujor ka përfunduar operacioni “Vela”, si rezultat i të cilit janë vënë në pranga shtetasit D. Ll., 46 vjeç, A. Gj., 44 vjeç, F. N., 46 vjeç dhe A. D., 47 vjeç, banues në fshatin Velë dhe Lezhë.
“Këta shtetas dyshohet se gjatë vitit 2020, në zonat pyjore të fshatit Velë, Njësia Administrative Kolsh, Lezhë, kanë kultivuar bimë narkotike cannabis sativa, të cilat janë evidentuar dhe asgjësuar nga shërbimet policore”, njofton policia.
Materialet procedurale u referuan në Prokurorinë pranë Gjykatës së Shkallës së Parë Lezhë, për veprën penale “Kultivim i bimëve narkotike”./ Opinion.al
