Letrës së gjatë të kryeministrit Edi Rama, nga PD i është përgjigjur Sekretari i Përgjithshëm, Gazment Bardhi. Në një reagim në rrjetet sociale ai thotë se letrat e Ramës janë luftënxitëse.
“Duke injoruar shkaqet reale të krizës dhe problemet reale të qytetarëve, duke i fyer ata sa herë që ka mundësi, duke mos patur ndjeshmërinë më të vogël për mijëra prindër që nuk kanë me çfarë ushqejnë fëmijët, duke u hakmarrë politikisht dhe duke dërguar tatimet në bizneset e qytetarëve që dalin në protestë, duke mos hequr dorë nga kërcënimi për prishjen e shtëpive që pengojnë planet e tij korruptive, Edi Rama nuk bën asgjë tjetër me letrat e tij, veçse nxit dhunë dhe provokon qytetarët që u ka shkuar thika e pushtetit të tij në palcë. Në vend që të shkruajë letra luftënxitëse, që me hipokrizi i quan “ftesa për dialog”, Edi Rama bën mirë të kuptojë se ai është i pafuqishëm të ndalë triumfin e shqiptarëve të bashkuar”, shkruan Bardhi.
Sipas tij opozita nuk do të ketë asnjë tërheqje nga kauza e tyre, “për zgjedhje të lira e të ndershme, për të ndërtuar Shqipërinë si gjithë Europa”.
Letra e Ramës nis me paralajmërimin se koha për dialog po mbaron dhe gjithçka mbyllet në ditën që nis fushata elektorale për 30 qershorin.
Pavarësisht se thotë se është gati për dialog pa kushte, kryeministri parashtron qëndrimin e tij: Zgjehdjet lokale nuk shtyhen dhe mandati i qeverisë vazhdon deri në 2021, duke nënkuptuar kështu dhe mos largimin e tij./ Opinion.al
