Një episod dramatik ka shënuar çerekfinalen e Kupës së Botës për Klube midis Bayern Munich dhe Paris Saint-Germain, ku talenti gjerman Jamal Musiala pësoi një dëmtim të rëndë në këmbën e majtë, pas një përplasjeje me portierin italian Gianluigi Donnarumma.
Sipas Bild, bëhet fjalë për një thyerje të fibulës së majtë dhe dëmtim të ligamenteve, çka do të detyrojë Musiala-n të qëndrojë jashtë fushave për katër deri në pesë muaj.
Incidenti ndodhi në fund të pjesës së parë, gjatë një daljeje të Donnarumma-s, i cili u përplas me Musiala-n, duke i mbërthyer kyçin e këmbës së tij nën trupin e tij. Reagimi ishte i menjëhershëm: Musiala u largua me barelë, ndërsa mbulonte fytyrën nga dhimbja dhe shoku. Edhe Donnarumma, që e kuptoi menjëherë seriozitetin e lëndimit, u pa duke vendosur duart në fytyrë, i tronditur.
Me rikthimin në fushë, portieri italian u fishkëllye nga tifozët sa herë që prekte topin, në shenjë pakënaqësie për atë që ndodhi.
Kapiteni i Bayernit, Manuel Neuer, ishte i ashpër në kritikat e tij ndaj kolegut italian:
“Ajo që bëri me Musiala ishte e rrezikshme. Ai e dinte se mund ta lëndonte. I thashë të shkonte të shihte si ishte. Është çështje respekti.”
Neuer kritikoi edhe mungesën e reagimit të menjëhershëm të Donnarumma-s në drejtim të Musiala-s, duke shtuar se një gjest i tillë tregon mungesë korrektësie në fushë.
Pas përfundimit të ndeshjes, Donnarumma reagoi përmes Instagram-it, ku publikoi një mesazh për Musiala-n:
“Të gjitha lutjet dhe urimet e mia të mira janë me ty, Jamal Musiala.”
