Aleati i së djathtës Agron Duka është lëkundur në qendrimet e tij. Ose të paktën këtë la të kuptohet sot. Duka nuk ishte i pranishëm mesditën e sotme në mbledhjen që Lulzim Basha zhvilloi me aleatët fill pas negociatave që lideri demokrat zhvilloi në Presidencë me Kryeministrin Rama.
Sakaq në një tjetër aktivitet ku ishte i pranishëm, Agron Duka tha se Basha duhet të pranonte platformën e dërguarit e Brukselit, McAllister dhe eurodeputetit Flenskenstain për ndryshimin e 4 ministrave.
I ftuar në forumin e hapur të organizuar nga UET Kreu i Partisë Agrare Ambjentaliste u shpreh: “Unë do t’a pranoja, me pak ndryshime. Mund të pranoja që të shkonim në zgjedhje me të njëjtin kryeministër dhe që qeveria teknike të jetë reale, teknike jo me njerëz të përcaktuar nga Rama, siç është bërë oferta, edhe natyrisht të kishte një datë tjetër zgjedhjesh sepse në këtë datë janë të pamundura. Plus të paktën numërimin elektronik. Votimi elektronik mund të jetë i vështirë për shkak të kohës por numërimi elektronik në mënyrë taksative”.
Në përgjigje të pyetjeve nga auditori Duka u shpreh optimist për arritjen e një kompromisi të orëve të fundit ndërsa ai vetë la të hapur mundësinë e pjesëmarrjes së partisë së tij në zgjedhje duke pranuar se brenda partisë ka dy qëndrime për çështjen.
“Ka njerëz që mendojnë se kjo mund të na rëndojë politikisht në të ardhmen, ka njerëz që mendojnë nëse ne hyjmë, legjitimojmë mazhorancën, i biem ndesh atyre që kemi thënë tashmë që nuk ka situatë për zgjedhje të lira dhe të ndershme, por kjo mazhorancë që mund të krijohet mund të ketë një jetëgjatësi të shkurtër, e cila mund të ketë një kosto negative për të ardhmen politike. Ne jemi pikërisht në këtë lloj diskutimi nuk po e gjejmë dot cila është më e mira. Na kanë mbetur dhe 3-4 orë për të biseduar dhe për të vendosur.”
Kujtojmë se Agron Duka është i regjistruar në KQZ, edhe pse është shfaqur gjithnjë në krah të Bashës dhe partive të tjera opozitare në mbështetje të kauzës për zgjedhje të lira.
