Kryesore

Lehtësohen kriteret e kredisë gjatë tremujorit të dytë të vitit


               Publikuar në : 13:35 - 20/04/19 |
el ida

Bankat parashikojnë të lehtësojnë kriteret e huadhënies si për bizneset, ashtu edhe për individët gjatë tremujorit të dytë të këtij viti, ndërkohë presin gjithashtu rritje të kërkesës për kredi nga këto dy segmentet kryesore të tregut.

Statistikat e Bankës së Shqipërisë tregojnë se në dy muajt e parë të vitit 2019 portofoli i kredisë për ekonominë u rrit me gati nëntë miliardë lekë, ku ndikimin më përcaktues e ka dhënë gjallërimi i kredisë për bizneset, që në dy muajt e parë të vitit është rritur me rreth shtatë miliardë lekë. Ndërkohë, kredia për individët ka vijuar rritjen e qëndrueshme, në ndjekje të tendencës pozitive të viteve të fundit.

Vrojtimi i aktivitetit kreditues tregoi gjithashtu një shtrëngim të lehtë në standardet e kredisë për tremujorin e parë. Në kredinë për biznese, ky shtrëngim u shpreh kryesisht përmes një rritje të lehtë të marzheve të interesit. Ndërkohë, një shtrëngim të lehtë pati edhe në kredinë për blerje banesash për individët.

Sidoqoftë, duke pasur parasysh rritjen sasiore të kredisë në muajt e parë të vitit, ky shtrëngim nuk duket të ketë pasur ndonjë ndikim të rëndësishëm në ritmin e huadhënies. Nga ana tjetër, duke parë parashikimet e bankave për tremujorin e dytë, shtrëngimi relativ i tremujorit të parë duket se ka qenë i përkohshëm./Opinion.al

Pas