Bilbil dhe Jashar Maja kanë bërë zyrtarisht ankimim kundër vendimit të prokurorisë për lehtësimin e veprës penale për fisin Rraja, anëtarët e të cilit i dhunuan barbarisht disa javë më parë.
Ndryshe nga nisja e hetimit për “plagosje të rëndë me dashje, në bashkëpunim” pas publikimit të dhunës me shkopa bejsbolli prokuroria vlerësoi që hetimi duhet të vijojë për akuzën e “plagosjes së lehtë me dashje”.
Bilbil dhe Jashar Maja kërkojnë ndjekjen penale dhe dërgimin për gjykim të anëtarëve të fisit Rraja.
Gjithashtu ata kanë bërë edhe dy kërkesa prokurorisë, si kryerjen e veprimeve hetimore shtesë, në administrim të provave dhe kryerjen e një akti tjetër ekspertimi.
Në kërkesë ata shpjegojnë se nuk janë dakord me procesverbalin e firmosur para OPGJ dy ditë më parë dhe se e kanë firmosur pa pasur dijeni.
Ndërsa këtë të enjte i kanë dërguar me postë prokurorisë ankimimin dhe dy kërkesat.
Kujtojmë se dhuna ndaj kushërinjve Maja ndodhi pasi Majat u ankuan në polici se gurorja që është në pronësi të Përparim Rrajës, vëllait të ish-deputetit socialist, Rrahman Rraja po iu dëmtonte banesat.
