Në prag të festave të fundvitit shumë nga institucionet e vendit organizojnë mbrëmjet festive për stafin dhe miqtë e tyre. Edhe FSHF ka organizuar një pritje gala, ku ka ftuar sportistët dhe miqtë e saj në vite.
Mes emrave të cilëve u ka shkuar një ftesë për pritjen gala ishte edhe Vasil Ruçi, legjenda e futbollit vlonjat i konsideruar nga specialistët dhe mediat rebel i fushës.
Panorama sport, shkruan se pak ditë para mbrëmjes Gala të FSHF-së, një prej zyrtarëve të lartë të kësaj të fundit, në emër të institucionit i ka dërguar një mesazh në numrin e tij personal Vasil Rucit, duke e ftuar zyrtarisht për të marrë pjesë të premten në ceremoninë e fundvitit.
Mirëpo, ish-sulmuesi bëri një “driblim” të rrallë, teksa, pasi refuzoi të pranonte ftesën, i ktheu edhe një përgjigje nga ato që i kanë të gjitha brenda.
“Faleminderit për ftesën pas 15 viteve, por kam frikë të vij se mos më jepni bukë të helmuar si Petro Nini Luarasit…”, ishte mesazhi epik i Vasil Rucit.
