Qytetari Pëllumb Dylmishi nga Portëza e Fierit është ankuar pranë emisionit Stop në Tv Klan se Kadastra e Fierit i ka regjistruar pronën gabim dhe prej disa vitesh ky problem nuk ka marrë zgjidhje, pavarësisht ankesave të tij.
Ai tregon se në vitin 2016 ka filluar procedurat e legalizimit dhe ka kuptuar se në hartë shtëpia e tij dilte në truallin e komshiut.
Ka dërguar shkresa në Drejtorinë vendore dhe në Drejtorinë e Përgjithshme, por ende s’ka marrë zgjidhje.
“Kam pasur shtëpinë e vjetër që është që në 1959 dhe e prisha atë dhe bëra shtëpi 2-katëshe. Janë truallet e vjetër siç i ka ndarë shteti. Sipas listës së vjetër unë ekzistoj tek 12/15. Mirëpo këtu është një problem. Komuna apo kush e ka bërë kanë vënë tek trualli i shtëpisë time kanë vënë emrin e komshiut, shtëpia e të cilit ndodhet nga krahu i jugut ngjitur me shtëpinë time. Në dokumente shtëpia e tij del nga krahu nga veriu tek 12/14 që mban numrin 12/22 dhe 12/23 dhe është shtëpia e komshiut tjetër. Jam ankuar kush e di sa herë te ASHK. Kanë thënë do e zgjidhim, kam 5 vjet edhe sot e kësaj dite nuk ma kanë zgjidhur. I jam drejtuar ASHK-së së Tiranës, më kanë kthyer përgjigje dhe orientuan dhe ASHK-në e Fierit që të interesohen për problemin tim që të ma zgjidhin. Deri sot e kësaj dite unë u detyrova të marr Stopin se nuk ma zgjidh asnjë problemin”, thotë z.Pëllumb Dylmishi.
Stop iu drejtua Kadastrës dhe ky institucion na informoi se gabimi është bërë nga njësia administrative, por me dakordësinë e qytetarëve, ky problem do të zgjidhet.
Aktualisht, pas interesimit të Stop, palët janë paraqitur në Drejtorinë e Kadastrës, kanë dhënë dakordësinë e tyre dhe janë në pritje të korrigjimit në dokumentacion./ Tv Klan
