Policia e Durrësit ka ndaluar ekonomistin e Agjencisë Shtetërore të Kadastrës Durrës dhe ka shpallur në kërkim Zv/ Drejtorin dhe një specialist në këtë institucion pasi dyshohet se janë pjesë e një skeme abuzive me legalizimet.
Sipas burimeve të policisë bëhet e ditur se në kuadër të goditjes së veprave penale kundër evazionit fiskal në zonat turistike, u ndalua shtetasi R.K., 27 vjeç, banues në Durrës, me detyrë ekonomist pranë Agjensisë Shtetërore të Kadastrës – Durrës. Ndërkohë, po punohet për kapjen e shtetasve me inicialet A.I., 42 vjeç, banues në Durrës, me detyrë Zv/Drejtor pranë Agjensisë Shtetërore të Kadastrës si dhe F.R., 28 vjeç, banues në Durrës, me detyrë specialist pranë Kadastrës.
Këta persona akuzohen se kanë pajisur me leje legalizimi duke falsifikuar dokumentet dy shtetas për një sipërfaqe 123 metra katror dhe truall 500 metra katror në zonën e plazhit.
Tre shtetasit e mësipërm janë proceduar për veprat penale ” Korrupsioni pasiv nga persona që ushtrojnë funksione publike”,” Shpërdorimi të detyrës ” dhe “Falsifikimi i dokumenteve ” parashikuar në nenet 259, 248 dhe 186/3 të Kodit Penal. /Opinion.al
