Partia Demokratike ka publikuar ditën e sotme të dhënat e Bankës Botërore dhe BERZH, të cilat e renditin Shqipërinë të dytën në botë sa i takon nivelit të korrupsionit.
Në një postim në rrjetet sociale, deputetja e zgjedhur e PD, Jorida Tabaku shkruan se ky shtet është i kapur nga korrupsioni. Më tej ajo vijon duke thënë se një regjim që vjedh zgjedhjet mund të ofrojë vetëm vjedhjen dhe korrupsionin si formë qeverisje.
“Një shtet i kapur nga korrupsioni, që fut duart në xhepat e sipërmarrjeve dhe qytetarëve. Kjo është e vërteta e Shqipërisë që pasqyrohet edhe nga Banka Botërore dhe BERZH.
Të dytët në botë për korrupsionin, me zyrtarë që mbushin portofolet nga taksat e shqiptarëve dhe u heqin fitimet bizneseve të shqiptarëve. 3 herë më shumë korrupsion paguajnë bizneset shqiptare në raport me 8 vite më parë!
Ky nuk është as raporti i vetëm dhe as raporti i fundit ndërkombëtar që tregon natyrën e vërtetë të regjimit të korruptuar që shqiptarët kanë përballë.
Korrupsioni është oksigjeni i kësaj mazhorance prandaj ajo stimulon pandershmërinë dhe paligjshmërinë. Një regjim që vjedh zgjedhjet mund të ofrojë vetëm vjedhjen dhe korrupsionin si formë qeverisje!”, shkruan Tabaku./Opinion.al
