Këshilli i përgjithshëm i Lidhjes Demokratike të Kosovës pritet të vendosë nesër për një marrëveshje për koalicion qeverisës me AAK-në, Nismën, AKR-në dhe pakicat.
Këtë e ka bërë të ditur kreu i LDK-së, Isa Mustafa në një intervistë për mediat vendase.
“Unë kam iniciuar marrjen në parim të pajtueshmërisë nga Këshilli i përgjithshëm për një koalicion qeverisës me AAK-në, Nisma Socialdemokrate-AKR dhe partitë e komuniteteve jo shumicë, në rast se pas shterjes së rrugëve kushtetuese me partinë fituese relative të zgjedhjeve, LVV, i ofrohet mandati LDK-së, si parti e dytë”, ka deklaruar ai.
Mustafa thotë se Këshilli i Përgjithshëm do të vendos më së largu deri nesër në orën 16:00.
“Përgjigjen nga anëtarët e Këshillit të Përgjithshëm duhet ta kem nesër deri ne ora 16:00. Nuk do të marr asnjë veprim pa pajtimin e organit, i cili vendos për koalicionet në nivel qendror”, ka shtuar ai.
Tashmë kanë kaluar dy javë që kur presidenti Thaçi i ka kërkuar nga Lëvizjes Vetëvendosje që të bëjë propozimin për emrin e të mandatuarit që do të krijojë qeverinë e re, pasi që qeveria e koalicionit LVV-LDK u rrëzua në Kuvend me mocion mosbesimi.
Kryeministri në detyrë Albin Kurti ka deklaruar se do t’i kthejë përgjigje presidentit pasi të ketë kaluar kriza e koronavirusit. Nuk dihet afati kohor kur mund të dorëzohet emri për të mandatuarin e qeverisë por Mustafa thotë se atë e vendos Presidentit në bazë të interpretimit të Kushtetutës.
“Radha është që Lëvizja Vetëvendosje ta marrë mandatin si përgjegjësi qytetare dhe të provojë ta sigurojë një shumicë. Nuk ka arsye të mos veprojë, sepse vendi nuk mund të drejtohet në këtë situatë nga një qeveri në detyrë e cila nuk mund ti adresohet Parlamentit për masat e nevojshme, Sa i përket kohës, është institucioni i Presidentit që vendosë mbi bazën e interpretimit të Kushtetutës”, bëri të ditur Mustafa. /Opinion.al
