Mali i Zi, Maqedonia e Veriut dhe Bullgaria kanë ndaluar fluturimin e avionit që duhej të lejonte ministrin e Jashtëm rus Sergei Lavrov të vizitonte nesër Beogradin, konfirmuan për Danas burime jozyrtare.
Në të njëjtën kohë, nga zyra e presidentit të Serbisë, Aleksandar Vuçiç, ka njoftuar se nesër në orën 10 do të takohet me ambasadorin rus në Beograd, Aleksandar Bocan-Kharchenko.
Siç ishte paralajmëruar më parë, kreu i Ministrisë së Punëve të Jashtme ruse duhet të vizitojë Republikën e Serbisë më 6 dhe 7 qershor. Janë planifikuar takime me presidentin serb, ministrin e punëve të jashtme, kryetarin e Kuvendit Kombëtar dhe patriarkun e Kishës Ortodokse Serbe.
Kujtojmë se kryeministrja Ana Brnabiq deklaroi sot se situata rreth mbërritjes së ministrit të Jashtëm rus Sergei Lavrov në Beograd është “jashtëzakonisht e komplikuar” dhe se presidenti serb Aleksandar Vuçiç po merret me logjistikën e udhëtimit të tij.
“Është vërtet e pabesueshme që situata në Evropë dhe në botë është e tillë që presidenti i një vendi duhet të merret me gjëra të tilla, siç është logjistika e udhëtimit të një ministri të Jashtëm, që përcakton nëse ai do të vijë apo jo”,-tha Brnabiq.
Presidenti i Serbisë, Aleksandar Vuçiç, dy ditë më parë tha se vizita e ministrit rus Sergej Lavrov tashmë është planifikuar dhe se rezultati i vizitës është i pasigurt derisa të realizohet.
Ai shtoi se nuk përjashton mundësinë që vizita e ministrit të Punëve të Jashtme të Rusisë, Sergej Lavrov në Beograd, të rrezikojë vizitën e kancelarit gjerman Olaf Scholz./Opinion.al
