Komunistët janë aty si çdo 29 Nëntor, në Varrezat e Dëshmorëve për të nderuar të rënët në luftë. Me foto të diktatorit Enver Hoxha në duar dhe me parulla “Lavdi Partisë Komuniste shqiptare”; “Lavdi veprës së Enver Hoxhës”; “Rroftë Partia Komuniste Shqiptare” dhe me simbole të tjera të PKSH-së ata kanë parakaluar para mediave dhe zyrtarëve të shtetit.
Nostalgjikët vizituan “Varrezat e Dëshmorëve” në të njëjtën kohë kur kryen homazhet edhe Presidenti Meta, kryeministri Rama dhe kryeparlamentari Ruçi.
Në Shkodër u shënua një tjetër rast flagrant. Një person nderon me grusht gjatë ceremonisë shtetërore dhe në prani të zv.ministres Mesi. Duhet theksuar se përshëndetja me grusht është simbol komunist dhe jo partizan.
Pas 27 vitesh demokraci, Shqipëria, vendi që jetoi për 50 vite në një diktaturë të ashpër vazhdon të lejojë këto shfaqje të turpshme. Disa herë është folur nga demokratët për të ndaluar me ligj simbolet e komunizmit, por në fakt asgjë konkrete nuk ka. Drafti është harruar në sirtar, ndërsa për partinë socialiste në pushtet, kjo shfaqje nuk ka se si të përbëjë problem, kur në krye të Kuvendit, ka Gramoz Ruçin, një ish-funksionar të regjimit komunist.
/Opinion.al
