Kanye West është pezulluar nga platforma Twitter dhe është akuzuar për nxitje të dhunës për shkak të postimeve fyese në Twitter vetëm dy muaj pas pezullimit të tij të fundit.
Reperi amerikan, i cili tani quhet Ye, postoi një sërë postimesh në Twitter, ku në njërin prej tyre tregohej një simbol që kombinonte një svastikë dhe një yll hebre.
BBC shkruan se, shefit të ri të Twitter, Elon Musk iu kërkua nga përdoruesit që të pezullonte sërish reperin e njohur.
“Unë bëra më të mirën. Pavarësisht kësaj, West përsëri shkeli rregullin tonë kundër nxitjes së dhunës. Llogaria do të pezullohet.” shkroi Musk në një postim në Twitter.
Gjithashtu të enjten, gjatë një interviste me teoricienin e konspiracionit amerikan Alex Jones dhe me fytyrën e mbuluar me maskë, Kanye West lavdëroi udhëheqësin nazist Adolf Hitler, gjë që nxiti shumë reagime nga kritikët e tij.
Kreu i Trustit Arsimor të Holokaustit në Mbretërinë e Bashkuar i përshkroi komentet e West si “të neveritshme”.
Në muajt e fundit West ka shkaktuar polemika me një sërë komentesh antisemite dhe raciste duke çuar në ndërprerjen e lidhjeve me reperin nga gjiganti i veshjeve Adidas./Opinion.al
