Presidenti Vladimir Putin, në 80-vjetorin e dorëzimit të Gjermanisë Naziste mbajti një fjalim solemn në sheshin e Kuq në Moskë, duke theksuar kontributin vendimtar të Bashkimit Sovjetik në fitoren mbi nazizmin.
Mbi të gjitha ajo që ra më shumë në sy ishte heshtja e tij ndaj luftës aktuale në Ukrainë, konflikti më i madh në Evropë që nga Lufta e Dytë Botërore.
Gjatë fjalimit të tij që zgjati vetëm 10 minuta, ai u përpoq të shmangte çdo referencë të drejtpërdrejtë ndaj pushtimit të Ukrainës. Në vend të kësaj, ai u përqendrua në trashëgiminë historike të Luftës së Dytë Botërore dhe mbrojti të ashtuquajturin “operacion special ushtarak”, pa e përmendur në mënyrë direkte.
“Ne i kujtojmë mësimet e Luftës së Dytë Botërore dhe nuk do të pajtohemi kurrë me shtrembërimin e historisë,” deklaroi Putin. Ai gjithashtu pohoi se “e vërteta dhe drejtësia janë në anën tonë” dhe se “i gjithë populli mbështet pjesëmarrësit e operacionit special ushtarak”.
Heshtja për Ukrainën, sipas analistëve, mund të interpretohet si përpjekje për të shmangur diskutimin e një lufte të papërfunduar dhe shumë të kontestuar brenda e jashtë Rusisë.
Siç raportojnë mediat ndërkombëtare, Putin iu përgjigj edhe deklaratave të fundit të presidentit amerikan, Donald Trump, i cili theksoi rolin kyç të SHBA-së në fitoren e Luftës së Dytë Botërore.
“Ne gjithmonë do të kujtojmë se hapja e frontit të dytë në Evropë – pas betejave vendimtare në territorin e Bashkimit Sovjetik – e afroi fitoren. Por askush nuk e mohon se ishte Rusia ajo që shënoi fundin e nazizmit dhe e pagoi me miliona jetë”. Krahasuar me tonin e ashpër të fjalimeve të viteve të kaluara – ku shpesh i krahasonte SHBA-të me Rajhun e Tretë ose i akuzonte për “poshtërimin e botës” – këtë herë, Putini shfaqi një ton më të përmbajtur, ndoshta për të ruajtur një imazh më të balancuar në një skenë ndërkombëtare gjithnjë e më të tensionuar.
