14 tonë pilula amfetamine të llojit “Kaptagon” që vinin nga Siria, të cilat kapin një vlerë rreth 1 miliard euro, janë kapur nga policia italiane.
Një ndër sasitë më të mëdha të drogës të kapura në të gjithë botën, ishte futur në 3 konteinerë të mbushur me cilindra letre për përdorim industrial në portin e Salernos në jug të Italisë.
“Kaptagon” është një ndër disa emërtimet për fenetilin hidroklorid, një drogë që bën pjesë në familjen e amfetaminës, një stimulues për sistemin nervor qendror. Kjo lloj droge mund të largojë frikën dhe lodhjen, ndërsa është më popullore në vendet e Lindjes së Mesme.
Policia italiane shton se “Kaptagon” e njohur ndryshe dhe si “droga e xhihadistëve” mendohet se ka përfunduar në Itali pasi izolimi për shkak të pandemisë ka bllokuar prodhimin dhe shpërndarjen e drogave sintetike në kontinent, duke detyruar trafikantët të marrin dërgesa nga Siria./Opinion.al
