Largohet drejtori i Durrësit, çfarë gjeti Manastirlliu në spital?

Ka dhënë dorëheqjen sot drejtori i spitalit të Durrësit, Alban Ramohitaj, i cili është njëherësh edhe kryetar i Këshillit Bashkiak të Durrësit (PS) dhe njihet në qytet si krahu i djathtë i Vangjush Dakos. Në fakt burime të sigurta nga ky spital thanë se ka qenë një dorëheqje e detyrueshme dhe vjen dy ditë pas vizitës së ministres së Shëndetësisë Orgerta Manastirlliu. Ajo vizitoi spitalin e dytë më të madh rajonal në vend pas ankesave të pacienteve dhe mjekeve per keqmenaxhim, mungesë të medikamenteve dhe produkteve mjekësore. Duket se Manastirlliu përpara gjendjes alarmante në këtë spital nuk ka patur rrugë tjeter përveç largimit të drejtorit, i cili u rikonfirmua në detyrë pak muaj më parë. Ramohitaj ishte fituesi i konkursit të organizuar nga Ministria e Shëndetësisë për spitalin e Durrësit. Pas këtij largimi të papritur pritet që vendin e mbetur bosh ta plotësojë kandidati që zuri vendin e dytë në konkursin për drejtues, mjekja Nadire Kërtusha Jani, që aktualisht mban detyrën e shefes së repartit infektiv në këtë spital./Opinion.al