Zyrtarisht është shpallur vendi vakant për Drejtor i Qendrës Kombëtare të Kulturës së Fëmijëve dhe Teatrit të Kukullave. Kjo detyrë prej vitesh mbahej nga aktorja Monika Lubonja. Ministria e Kulturës e drejtuar nga Kumbaro që vete e emëroi znj. Lubonja nuk ka dhënë shpjegime për largimin e saj. Në faqen zyrtare u bëhet thirrje personave të interesuar të marrin pjesë në konkurs për të zënë vendin e Lubonjës.
“Në zbatim të Vendimit të Këshillit të Ministrave nr. 173, datë 07.03.2003 “Për emërimin, lirimin ose shkarkimin nga detyra të drejtuesve të institucioneve, në varësi të Këshillit të Ministrave, Kryeministrit ose Ministrit”, si dhe të Ligjit 10352, datë 18.11.2010 “Për artin dhe kulturën”, i ndryshuar, Ministria e Kulturës shpall konkursin për pozicionin: Drejtor në Qendrën Kombëtare të Kulturës për Fëmijë. Aplikimi dhe dorëzimi i dokumentave të bëhet brenda datës 13/04/2018, pranë Zyrës së Protokollit, në Ministrinë e Kulturës” – thuhet ndër të tjera në njoftimin e Ministrisë së Kulturës.
Por pas këtij shkarkimi ka hije skandali. Burimet thanë se Prokuroria e Tiranës ka nisur hetime, pas denoncimit në emisionin investigativ “Boom”, raporton Ora News.
Emisioni “Boom” provoi sesi shiteshin për interes të aktiviteteve private repertori i shfaqjeve të Teatrit të Kukullave; se si çelësat e këtij institucioni i ishin besuar një gazetashitësi që kishte tezgën e tij pranë këtij institucioni dhe se si kushtet e sigurisë në Teatrin e Kukullave vinin në rrezik fëmijët.
Një tjetër skandal i denoncuar në “Boom”, ishte eshe ai kupave të shpërndara me rastin e 70 vjetorit të Qendrës së Fëmijëve, të drejtuar nga Monika Lubonja. Tenderi i këtyre kupave, u zhvillua 1 javë pas aktivitetit, ku mori pjesë edhe Ministrja e Kulturës.
