Ministri i Jashtëm Igli Hasani ka njoftuar largimin nga territori i Gazës të 5 shtetasve shqiptarë, një nënë dhe 4 fëmijët e saj, të cilët tashmë kanë hyrë në territorin e Egjiptit. Në një postim në platformën X, Hasani shprehet se vijon puna për të larguar të tjerë shtetas shqiptarë nga territori i Gazës.
Postimi i ministrit në platformën X
Pas tre javësh përpjekjesh e vështirësish, më në fund shtetasit e parë shqiptarë, një nënë dhe 4 fëmijët e saj të mitur, sapo lanë territorin e Gazës.
Ata ndodhen tashmë të sigurt në Egjipt, ndërsa vijojmë proçedurat për kthimin e tyre sa më të shpejtë në Shqipëri.
Mirënjohje për autoritetet e Izraelit dhe Egjiptit për bashkëpunimin, për mbështetjen si dhe kolegëve të ambasadave shqiptare në Izrael dhe Egjipt për punën e mirë në këtë situatë e operacion kompleks.
Po punojmë ngushtë me autoritetet për kthimin e shpejtë e të sigurt të shtetasve të tjerë shqiptarë që ndodhen në Gaza.
