Princ Harry dhe Dukesha Meghan Markle njoftuan gjatë ditës së djeshme tërheqjen e tyre nga titujt dhe rolet mbretërore, duke shtuar se jeta e tyre do të vijojë midis SHBA dhe Anglisë.
“Ne synojmë të tërhiqemi si anëtarë të lartë’ të familjes mbretërore dhe do të punojmë për t’u bërë të pavarur financiarisht, duke vazhduar të mbështesim plotësisht Mbretëreshën”, thuhet në letrën e Dukës dhe Dukeshës së Sussex.
Tani planifikojmë të ekuilibrojmë kohën tonë midis Mbretërisë së Bashkuar dhe Amerikës së Veriut, duke vazhduar të respektojmë detyrën tonë ndaj Mbretëreshës dhe Komonuelthit.
Ky ekuilibër gjeografik do të na mundësojë të rrisim djalin tonë me një vlerësim për traditën mbretërore në të cilën ai lindi, duke i siguruar gjithashtu familjes tonë hapësirën për t’u përqëndruar në kapitullin tjetër, përfshirë këtu edhe fillimin e entitetit tonë të ri bamirës.
Ne mezi presim të ndajmë detajet e plota të këtij hapi tjetër emocionues në kohën e duhur, ndërkohë që vazhdojmë të bashkëpunojmë me Mbretëreshën, Princin e Uellsit, Dukën e Kembrixhit dhe të gjitha palët përkatëse. Deri atëherë, ju lutemi pranoni falënderimet tona më të thella për mbështetjen tuaj të vazhdueshme”, -shkruhej në letrën e tyre.
Por duket se ky vendim i marrë nga çifti nuk është pritur dhe aq mirë nga Mbretëresha dhe pjesa tjetër e familjes mbretërore.
Përmes një njoftimi familja mbretërore është shprehur se e kuptonte dëshirën e tyre për t’u distancuar nga detyrat e tyre mbretërore, por ky largim do të do të ishte “i ndërlikuar” dhe do të merrte “kohë”.
Mediat britanike kanë shkruar se Mbretëresha ka qenë e ‘zhgënjyer’ nga ky vendim i çiftit, pasi ata nuk i kanë informuar familjarët për diçka të tillë, por gjithçcka u mësua nga mediat.
“E tronditur, e trishtuar dhe pak e zemëruar me çiftin”, -shkruajnë mediat britanike duke cituar burime brenda Pallatit Mbretëror.
Sipas burimeve të njëjta edhe Princ William me Dukeshën Kate Middleton kanë mbetur tejet të habitur nga ky vendim i çiftit./Opinion.al/
