“Benzina” ishte klipi më i fundit i Luana Vjollcës, e cila këto vitet e fundit ka plotësuar figurën e saj si showgirl, duke i hyrë edhe tregut të muzikës me publikimin shpesh të këngëve të reja.
E dashura tashmë e deklaruar e menaxherit të artistëve nga Kosova, Krenar Çoçaj, pas shumë vitesh karrierë si prezantuese në “Top Channel”, flitet se nuk do të rinovojë kontratën për sezonin e ri pas mbylljes së programit “Pa limit”. Ndërkohë, burime pranë Luanës na kanë treguar se ajo po punon që të hyjë në tregun e muzikës si këngëtare nën menaxheminin e të dashurit të saj, Çoçaj. Duket se historia po përsëritet, pasi po të kthehemi pas në kohë, disa vite më parë, kujtojmë që Krenari ishte jo vetëm i dashuri i këngëtares Dafina Zeqiri, por edhe menaxheri i saj personal. Ndërkaq, Luana pasi ka nxjerrë disa klipe muzikore, dhe pasi ka provuar eksperiencën e koncerteve bashkë me kunatin Getoar Selimi, e ka kuptuar që fitimet më të mëdha dhe karriera në vazhdim mund t’i shkëlqejë në fushën e muzikës.
Me linjat e rrumbullakosura dhe ekzibicionizmin skenik, tashmë e ka vërtetuar se mund të rrëmbejë zemrat e shumë ndjekësve në koncerte, ashtu siç ka mundur t’i tërheqë ata pas vetes në Instagram. Ndërkohë, duke nisur bashkëpunimin profesional me të dashurin, ata do të kenë mundësi të shkurtojnë distancat mes Prishtinës dhe Tiranës, duke planifikuar edhe një bashkëjetesë të mundshme. Djali simpatik dhe i pasur nga Prishtina, i cili arriti ta fuste në tregun e muzikës Dafina Zeqirin vite më parë (me ardhjen e saj nga Shtetet e Bashkuara të Amerikës kur s’e njihte askush), natyrisht që do t’ia dalë ta bëjë edhe Luanën një nga emrat e kërkuar dhe të paguar në koncerte, edhe pse ajo është komentuar në rrjetet sociale për zërin minimalist. Nga ana tjetër, Krenari nuk i ka mbyllur ende hesapet me të shkuarën, pasi vetëm pak javë më parë Drejtësia vendosi masën e dënimit gjashtë muaj burg për rrahjen që i bëri këngë- tarit Ledri Vula, për arsye xhelozie në kohën që ai ishte lidhur me Dafinën. Sot ai duket shumë i përkushtuar ndaj Luanës, madje e prezanton si gruan e tij, jo vetëm te familjarët, por edhe te miqtë. Hera e parë kur deklaroi publikisht ndjenjat e tij ndaj Luanës ishte gjatë kohës kur prezantuesja drejtonte emisionin “Pa limit”, dhe para transmetimit postonte në Instagram momente nga paskuintat e programit. Krenari nuk qëndroi indiferent ndaj një prej videove, mesa duket i ngacmuar nga komentet e shumta të djemve të tjerë, ndërsa i shkroi: “Vetëm ti mund ta bësh këtë. Vetëm ti mund të jesh aq seksi dhe e ëmbël në po të njëjtën kohë”.
Ky është komplimenti i parë hot që Luana mori nga i dashuri në rrjetet sociale, me të cilin u ndoqën në Instagram vetëm pak kohë më parë. Edhe pse ata vetë nuk kanë postuar asnjë foto çift, nuk i kanë shpëtuar dot syrit të paparacit, që i ka fotografuar fillimisht ndërsa dilnin nga një drekë romantike në Tiranë, e më pas duke shëtitur në Amsterdam. Më pas nuk kanë munguar videot e çiftit mes miqsh apo në darkat familjare. Për herë të parë, dyshimet se Luana kishte nisur romancë të re dashurie me mikun e ngushtë të reperit Getoar Selimi u hodhën më 10 korrik të vitit që lamë pas, kur ajo dhe Krenari festuan 28- vjetorin e tij në Santorini. Më pas lidhja e tyre ka vazhduar intensivisht edhe pse në distancë, pasi ajo jeton në Tiranë dhe ai në Prishtinë. Gjithsesi, ata e kanë zgjidhur të jenë afër, pasi udhëtojnë shpesh në vendet më të bukura të botës duke e shijuar në maksimum lidhjen e tyre.
