Ministri për Çështjet Vendore, Bledi Çuçi e ka komentuar të tepërt deklaratën e deputetit Ben Blushi.
Reagimi i ministrit Çuçi, vjen menjëherë pas letrës së bërë publike, ku deputeti socialist Ben Blushi bën me dije largimin nga Partia Socialiste.
Ndër të tjera, Blushi shprehej se “Rilindja është kthyer në një kazan plehrash”.
“Sigurisht që e ka tepruar, pa diskutim që po. Në lidhje me ligjin që u miratua, u them një gjë, është në funksion të ruajtjes së mjedisit, të pastrimit të Shqipërisë. Mos ishte ai biznes do kishim 120 mijë tonë plehra më shumë nëpër Shqipëri”, thotë Çuçi.
Sa i përket vendimit të Blushit për t’u larguar nga PS, ministri thotë se ky është vendim personal i tij për mënyrën si do të kontribuojë në politikën shqiptare.
“Është e drejtë e tij, nëse mendon se axhenda e mazhorancës dhe PS në mënyrë më specifike nuk përputhet me vizionin e tij politik, është e drejtë e tij për të zgjedhur rrugët e tij se si do kontribuojë në politikën shqiptare, apo në sektorin publik me idetë dhe vizionin që ai ka”, u shpreh ai.
Këto deklarata Bledi Çuçi i bëri nga qyteti i Fierit.
