Ish-ministri i Financave, Arben Malaj, ka treguar arsyet pse ka vendosur të mos kandidojë në zgjedhjet e25 prillit,
Malaj tha se kushdo mund të kontribuojë për vendin jo vetëm duke qenë deputet apo ministër. “Kështu që nuk largohem nga detyrimi për t’i shërbyer vendit tonë, por do të mundohem të bashkoj sa më shumë energji pozitive, që e gjelbërta, qoftë dhe ne zgjedhjet e ardhshme të pushtetit vendor, të fillojë të bëhet një zë i fuqishëm”, tha Malaj në një intervistë në News 24.
Më tej, ai foli për largimet nga Partia Socialiste, të Vasilika Hysit apo Besnik Baraj, duke thënë se ata kontribuuan shumë për selinë rozë, por tani u gjendën të braktisur. Më tej Malaj tha se nuk ishte radha e tyre as të vetëlargoheshin, as të largoheshin.
“Sigurisht që, e para dua t’iu shpreh mirënjohjen këtyre personaliteteve, por edhe të tjerëve, që lanë anën akademike dhe iu përkushtuan PS, ndërsa tani u gjendën të braktisur. Unë mendoj që vetëlargimi i tyre ka brenda edhe zhgënjimin e tyre. Nuk dua të abuzoj, por formimi i tyre akademik do ishte i domosdoshëm për PS. Nuk ishte radha e tyre as të vetëlargoheshin, as të largoheshin”, tha Malaj./Opinion.al
