Ambasada e Rusisë në Tiranë ka reaguar pas lajmit për dëbimin e diplomatit rus, Alexei Krivoshejev nga Shqipëria, me argumentin se kishte shkelur masat anti-COVID. Në një njoftimin zyrtar ambasada shkruan se është befasuar nga përmbajtja e deklaratës të Ministrisë së Jashtme të Shqipërisë për shtypin, pasi emri i Alexei Krivoshejev nuk është përmendur asnjëherë gjatë kontakteve mes ambasadës ruse dhe ministrisë së Jashtme të Shqipërisë.
Ambasada ruse sqaron se z. Krivoshejev, pas fillimit të nëntorit 2020 u diagnostikua me COVID-19, ndërkohë ishte nën protokoll mjekësor për dy javë, duke respektuar karantinimin, dhe më pas shkoi në punë vetëm pasi kaloi dy teste negative.
Më tej, ambasada ruse shkruan se akuzat e ngritura ndaj diplomatit, Alexei Krivoshejev, janë pa baza dhe vënë në dyshim zhvillimin e marrëdhënieve miqësore mes dy vendeve.
Njoftimi i Ambasadës Ruse në Tiranë
E konsiderojmë të paargumentuar vendimin e autoriteteve shqiptare për dëbimin e diplomatit rus. Gjithashtu, jemi të befasuar nga përmbajtja e deklaratës përkatëse për shtyp të MEPJ-së së Shqipërisë.
Përkundër pretendimeve të Ministrisë, emri i Aleksej Krivoshejev nuk është përmendur asnjëherë gjatë kontakteve midis Ambasadës Ruse dhe Ministrisë për Evropën dhe Punët e Jashtme të Shqipërisë. Për herë të parë dhe të fundit, ai është përmendur në Notën Verbale të MPJ-së me dt. 20.01.2021, sipas së cilës z. Krivoshejev është shpallur “persona non grata”. Në të njëjtën kohë, asnjë provë e shkeljes prej tij të masave anti-kovid, të vendosura në Shqipëri, nuk është sjellë.
Më herët, në korrik të vitit 2020, në një takim midis Ambasadorit dhe Ministrit në Detyrë për Evropën dhe Punët e Jashtme të Shqipërisë, G. Cakaj, u ngrit çështja e pretendimeve, meqë ra fjala, gjithashtu, mjaft të diskutueshme, për sjelljen e një diplomati tjetër. Pikërisht atëherë z. Ambasador premtoi të merrej me këtë çështje, premtim, i cili u përmbush. Vërejtje në adresë të këtij punonjësi nuk pati dhe ai u largua me sukses nga vendi pas disa muajsh, duke përfunduar shërbimin e tij.
Sa i përket z. Krivoshejev, pasi u diagnostikua me COVID-19 në fillim të muajit nëntor 2020, në përputhje me protokollin mjekësor, ai ka qendruar në vetëizolim për dy javë me anëtarët e familjes së tij, duke respektuar rreptësisht karantinën e përcaktuar, dhe ka dalë në punë vetëm pasi ka kaluar dy teste negative. Kontakte të jashtme, përveç vizitës në institucionet mjekësore për të kryer testet përkatëse, ai nuk ka patur.
Ne besojmë se akuzat kundër tij janë të pabazuara dhe të sajuara. Në sfondin e kësaj ngjarjeje, sigurimet e palës shqiptare në lidhje me përpjekjet e saj në drejtim të zhvillimit të marrëdhënieve miqësore midis vendeve tona ngjallin dyshime.
Gjithashtu, drejtojmë vëmendjen tuaj te fakti se, në përputhje me praktikën diplomatike ndërkombëtare, emrat e punonjësve të misioneve diplomatike të shpallur “persona non grata” nuk i komunikohen publikut. Kjo është, ndër të tjera, një nga detyrimet e vendit pritës, me qëllim ruajtjen e sigurisë personale të diplomatëve dhe anëtarëve të familjes së tyre. Publikimi i emrave mund të ndodhë, vetëm pasi punonjësi është larguar nga vendi pritës.
