Largimi i Briseida Shehajt nga administrata e lartë shtetërore është shoqëruar me një kuriozitet të madh jo vetëm nga gazetarët por edhe deputetët. Por deri tani, është heshtje në qeveri. Askush nuk pranon të komentojmë largimin e saj. Shehaj mbajti për 3 vite postin e drejtores së përgjithshme të Tatimeve dhe 2 muajt e fundit u spostua si zv.ministre e Ekonomisë. Dje u mësua se ajo i ka paraqitur dorëheqjen Ramës për arsye personale dhe prej sot nuk shkon më në punë.
Në sallën e Parlamentit ka qenë deputeti Astrit Patozi ai që foli për largimin e Shehajt. “A është e vërtetë që zv.ministrja, ish-drejtoresha e Përgjithshme e Tatimeve ka dhënë dorëheqjen apo ka ikur nga administrata? Uroj të mos jetë e vërtetë, pasi e cilësoj një dështim për financat e vendit. Na e sqaroni a është e vërtetë kjo?”, tha Patozi
Ministri Ahmetaj duke marrë fjalën pas Patozit u shpreh:
“Në respekt për opozitën dhe për zotin Patozi do përgjigjem për pyetjen. Po i tregoj se çfarë ka ndodhur me të ardhurat për këto 3 vite. (Deputetët qeshin) Vetëm këtë vit janë 240 mln dollarë të mbledhura më shumë se viti i kaluar. Dua t’ju rikujtoj në respekt të pyetjes së jemi përmirësuar për pagesën e taksave. Kemi bërë taksën e biznesit të vogël 0. (Patozi largohet nga salla) Përgjigjem, se kam respekt për opozitën…”, tha ai
Në fakt Ahmetaj u përgjigj, por nuk tha asgjë për Briseida Shehajn….
