Një i dënuar shqiptar nuk ka arritur të vërë në zbatim planin e tij për arratisje nga burgu i Koridhalosë në Greqi, pasi policia kreu një operacion të befasishëm në qelinë e tij.
Kontrolli në qelinë e të dënuarit Fabio Dushku, erdhi pas dyshimeve se ai kishte fshehur brenda qelisë, pajisje dhe armë që mund t’i përdorte për t’u arratisur nga burgu.
Përfundimisht, policia greke zbuloi dy laptopë brenda në qeli…të cilët ishin të lidhur me internet. Po ashtu, gjeti thika të sajuara, telefona celularë, grepa dhe sende të tjera.
Fabio Dushku dyshohet se po përgatiste arratisjen dhe e kishte deklaruar hapur me krenari miqësinë e tij për grupin grek “Bërthamat e zjarrit”.
Një polic që foli për mediat greke tha se ishte hera e parë që kapej një laptop në burgjet greke: “Kontrolli bëri të mundur që ne të ndalonim arratisjen në momentin e fundit,” tha ai.
Dushku, që në profilin e tij në Facebook shkruan se kishte studiuar ne shkolle si “vrasës profesionist”, kishte komunikuar edhe me Skype.
