Një nga rreziqet më të mëdha me të cilat po përballet bota gjatë pandemisë së koronavirusit është situata ekonomike. Ndërmarrja e masave izoluese con në mbylljen e shumë bizneseve por edhe në ulje të konsumit e për pasojë kjo sjell edhe rënien e vlerës së kompanive në tregjet ndërkomëtare. Pasojat e këtij fenomeni mund të jenë katastrofike pasi kompanitë mund të falimentojnë shumë shpejtë dhe mijëra njerëz do të ngelinin pa punë.
Por sic duket në raste krizash të tilla, ato që quhen ekonomitë më të forta të botës kanë mundësinë të ‘tregojnë muskujt’ duke mbështetur financiarisht bizneset dhe njerëzit.
Gjermania e cila cilësohet si motori ekonomik i BE-së është një nga ato vende që është fokusuar sa më shpejtë në minimizimin e pasojave ekonomike. Ditën e djeshme qeveria federale bëri të ditur se ka gati një paketë 500 miliardë eurosh në formën e huave për të gjitha bizneset për të mos i lënë të falimentojnë. Megjithatë Gjermania po e tregon tashmë fuqinë ekonomike edhe në shtete të vecanta të saj.
Landi jugor i Bavarisë ka akorduar një fond me vlerë 10 miliardë euro për të ndihmuar rajonin t’i rezistojë shpërthimit të koronavirusit.
Lajmin e bën të ditur agjencia e lajmeve, Reuters teksa citon kryeministrin e rajonit i cili shpalli gjithashtu gjendjen e jashtëzakonshme pasi numri i rasteve të reja vazhdon të rritet.
“Situata është shumë serioze dhe ndryshon çdo ditë, për fat të keq jo për mirë“, tha drejtuesi i Bavarisë Markus Soeder. Ai tha se qeveria bavareze mund të blejë aksione në kompani në vështirësi për të parandaluar falimentimet. /Opinion.al
