Avokati i Emiljano Shullazit, përmes një letre drejtuar Presidentit Meta, Kryeministrit Rama dhe Kreut të Kuvendit, Gramoz Ruçi, ka kundërshtuar vendimin e Ministrisë së Drejtësisë për vendosjen e klientit të tij në regjimin “41 bis”.
Por në një raportim në News 24, gazetarja Klodiana Lala, tha se ajo që meriton më shumë vëmendje në këtë moment, nuk është cështja e “41 bis”, por fakti që dosja e Shullazit po shkon drejt përfundimit të afateve në Gjykatën e Posaçme të Apelit, çka do të çonte në lirimin e Shullazit, ende pa u gjykuar.
“Vetëm për pak ditë përfundojnë afatet e paraburgimit, që Shullazi të dalë. Duhet të shqyrtohet kjo çështje, të zgjidhet problem i gjyqtarëve dhe fokusi kryesor duhe të kthehet tek vendimi i Gjykatës së Posaçme të Apelit”, tha Lala.
Emiljano Shullazi, përfundoi në pranga në prill 2016, pas denoncimit se ishte përfshirë në garën për zgjedhjen e rektorit të Universitetit të Tiranës përmes kërcënimit të kandidatit, Mynyr Koni.
Më 13 nëntor 2018, ai u dënua me 14 vjet burg për zhvatje pasurie, kërcënime dhe grup të strukturuar kriminal pas një procesi me shumë zvarritje. Katër të akuzuarit si anëtarë të bandës së tij, Gilmando Dani, Endrit Qyqja, Endrit Zela dhe Blerim Shullazi u dënuan me 41 vjet në total. Vendimi i shkallës së parë u apelua në Gjykatën e Apelit për Krime të Rënda si nga Prokuroria, ashtu edhe nga të pandehurit.
Gati 2/3 e seancave gjyqësore kanë dështuar për shkak të mungesës së avokatëve të zgjedhur apo të caktuar kryesisht. Ndërsa pjesa tjetër e seancave dështuan për shkak të pamundësisë së formimit të trupës gjyqësore.
Të dhënat e siguruara nga BIRN tregojnë se nga 17 gjyqtarë të Apelit të përfshirë në çështjen “Shullazi”, 11 u larguan me dorëheqje dhe 6 gjyqtarë u përjashtuan nga procesi pas breshërisë së kërkesave për përjashtim nga të pandehurit.
Në total, anëtarët e grupit Shullazi dorëzuan 25 kërkesa për përjashtimin e gjyqtarëve, kryesisht me argumentin se ata kishin shqyrtuar më parë çështjen e ish-hotel Vollgës.
Vazhdimi i bllokimit të procesit edhe me krijimin e organeve të reja të drejtësisë, mund t’u sigurojë lirimin e parakohshëm. Sipas nenit 263 të Kodit të Procedurës Penale, paraburgimi e humbet fuqinë nëse 9 muaj pas vendimit të shkallës së parë nuk merret një vendim i formës së prerë./Opinion.al
