Numri dy i qeverisë, Zv/ kryeministri Erjon Braçe paralajmëroi pasoja të rënda për “ata” që publikuan lajmin e rremë, i cili mbrëmjen e së dielës shkaktoi panik në Tiranë, por jo vetëm, sa i përket tërmeteve.
Në një deklaratë për mediat, ai tha se lajmi i publikuar ishte qëllimisht për të përhapur panik dhe kaos.
“Dje shoqëria shqiptare, siguria publike dhe kombëtare, ligji penal, u sfidua, u kërcënua, në kufijtë e kaosit, me dhunë dhe plaçkitje të mundshme nga lajmi i rremë i fabrikuar qëllimisht nga Syri.net, media online, shembull i gazetarisë së njëanshme, kriminale, politike dhe të kapur. Por kërcënimi serioz i rendit kushtetues, sigurisë publike dhe kombëtare kërkon të njëjtën vendosmëri për t’u përballur ligjërisht me lajmet e rreme, prodhuar në media dhe shpërndarë nga një rrjet kriminal dhe që dje shkaktoi panikun më të madh që mund të kishte pasoja shumë të rënda për jetën e qytetarëve dhe pronën”, tha Braçe.
“Autorët e këtij lajmi të rremë dhe zotëruesit e këtij rrjeti kriminal të përhapjes së këtyre lajmeve të përballen me ligjin me fuqinë 5.8 ballë me itensitet 8 ballë dhe me tregues nxitjeje 0.375 g. Të bëjnë ç’të duan të sajojnë alibinë e asaj që ndodhi, çdo gjë është e faktuar. Forca e ligjit do i japë fund këtij fenomeni njëherë e mirë. Loja me lajmet e rreme që kërcënon jetën e qytetarëve do të marrë fund tani ligjërisht edhe për një arsye tjetër, për t’i dhënë lirinë qytetarëve të marrin informacion e duhur. Askush nuk do të ketë ndërmend lotët e përpëlitjet e foshnjave në shkallët e pallateve, apo në makinat e prindërve. Nuk kam ndërmend të fal ankthin e prindërve”, tha më tej numri dy i qeverisë.
Tirana përjetoi mbrëmë momente kaotike si pasojë e një lajmi të rremë që u shpërnda nga disa portale për një tërmet të fuqishëm 6 ballësh që do të godiste qytetin në orën 23:30.
Mijëra familje, gra, burra, të moshuar, fëmijë e të sëmurë, të tmerruar nga ky lajm fals, lanë shtëpitë e tyre në mes të natës dhe dolën nëpër rrugë e nëpër parqe për t’u qëndruar larg ndërtesave.
Morën me vete çka mundën për të kaluar natën jashtë. Shumë të tjerë, nën panik, braktisën qytetin. Rrugët dalëse të Tiranës u bllokuan nga fluksi i makinave që nxitonin të largoheshin./ Opinion.al
