Ish-kryeministri i Greqisë, Lucas Papadhimos dhe shoferi i tij janë plagosur sot pasdite në Athinë, pas shpërthimit të makinës.
Mediat greke kanë raportuar se ish-kryeministri Papadhimos ka marrë plagë të rënda në duar, këmbë, bark dhe fytyrë, por është jashtë rrezikut për jetën.
Burimet paraprake tregojnë se makina ka shpërthyer në rrugën “Patission” në Athinë gjersa ishte në levizje dhe për pasojë ka sjellë plagosjen e ish-kryeministrit dhe shoferit të tij.
Mediat greke raportojnë se plagosja e ish-kryeministrit është një akt terrorist. Sipas tyre, në makinën e ish-Kryeministrit grek pati një shpërthim nga një lëndë ende e papërcaktuar dhe menjëherë u hapën jastëkët e ajrit.
Shpërthimi ndodhi kur ish-kryeministri hapi një zarf, brenda të cilit kishte material shpërthyes.
Forca të shumta policie shkuan në zonën ku ndodhi ngjarja dhe kanë nisur hetimet për këtë ngjarje të rëndë.
Nga hetimet paraprake, zarfi me lëndë eksplozive për ish-kryeministrin ka qenë një shenjë paralajmërimi.
Papadhimos, me profesion ekonomist, ka qenë kryeministër i qeverisë teknike nga nëntori 2011 deri në maj 2012.
Më parë ka qenë zv/President i Bankës Qëndrore Europiane nga viti 2002 deri në vitin 2010 dhe Guvernator i Bankës së Greqisë nga viti 1994 deri në vitin 2002.
