(Kandidati i PD-së, Isa Sakja)
Partia Demokratike ka zyrtarizuar kandidatin për zgjedhjet e pjesshme për Bashkinë Kavajë më 25 Qershor, 2017.
Emri i përzgjedhur nga demokratët është Isa Sakja, aktualisht mban postin e kryetarit të degës së PD-së, Kavajë.
25 qershori do të jetë jo vetëm një betejë për deputetët e rinj që do të hyjnë në Kuvendin e Shqipërisë, por edhe për një prej bashkive ku do të bëhen zgjedhje për kryetarin e ri të saj.
Partia Socialiste do të kandidojë më Dorian Muratin, Partia Demokratike me Isa Sakjan, ndërsa Levizja Socialiste për Integrim do konkurrojë për zgjedhjet e Kavajës me inxhinierin Maksim Konën.
Më 7 maj ishte planifikuar të zhvilloheshin zgjedhjet për kryetar bashkie të Kavajës, në një kohë që edhe presidenti i Shqipërisë e kishte dekretuar këtë. Mirëpo, ato u anuluan.
Kjo pasi kryeministri Rama e tërhoqi kandidatin e mazhorancës, e fill pas kësaj u dorëhoq edhe kandidati i pavarur.
Vetë Kryeministri i Shqipërisë, Edi Rama, dy ditë para 7 majit bëri të ditur anulimin e zgjedhjeve në Kavajë, ndërsa shtoi: “Provokimit antikushtetues, antiligjor e antidemokratik, ne nuk duhet dhe nuk do ti përgjigjemi flakë për flakë. Kavaja nuk do të bëhet sheshi për një shesh të neveritshëm. Turpi le ti mbetet PDsë. Unë i kam sugjeruar kandidatit tonë në Kavajë që të tërhiqet. Këtë ja ka kam kërkuar edhe kandidatit tjetër”, ka deklaruar kryeministri Rama.
