Është ndarë nga jeta në moshën 83 vjeçare artisti i njohur i muzikës operistike, Gaqo Çako.
Gaqo Çako i cili mban edhe titullin e lartë “Nderi i Kombit” dhe “Artist i Popullit” lindi më 24 janar 1935.
Ai është një nga tenorët më të njohur të Teatrit të Operas dhe Baletit, duke u rreshtuar ndër emrat më prestigjozë të Panteonit të muzikës shqiptare
Në vitet 1957 -1961 ai studioi në konservatorin “Cajkovski” të Moskës nën drejtimin e pedagoges Anna Soloviova. Pas kthimit në Shqipëri më 1961 ai u emërua tenor i përhershëm i Teatrit të Operës dhe Baletit të Tiranës, ku këndoi shumë nga rolet e para të repertorit operistik, duke u bërë kështu tenori kryesor për tri dekada me radhë.
Përvoja dhe karriera e tij mjaft e pasur në operat “Traviata”, “Bohema”, “Rigoleto”, “Norma”, etj, si dhe operat shqiptare “Mrika” e Prenk Jakovës, “Lulja e kujtimit” e Kristo Konos, “Pranvera” e Tish Daisë, “Heroina” e Vangjo Novës, “Skënderbeu” i Prenk Jakovës e “Skënderbeu” i Abdulla Grimcit, “Komisari” i Nikolla Zoraqit, “Zgjimi” i Tonin Harapit, “Toka e jonë” e Pjetër Gacit, etj, e bëjnë atë me një karrierë të shkëlqyer. Mjaft i njohur edhe në skenat italiane, ku ai ka mbaruar konservatorin e Santa Cecillias.
Gaqo Çako është edhe babai i këngëtarit të njohur Pirro Çako.
