Cikloni Zorbas ka mbërritur në brigjet e Greqisë, duke prekur fillimisht pjesën jugperëndimore të vendit.
Deri tani nuk janë raportuar probleme shumë serioze.
Erërat e forta po e rrisin vazhdimisht intensitetin e tyre, gjatë paradites vazhdojnë shtrëngatat e fuqishme të shiut, ndërsa në disa zona ka ndërprerje të energjisë elektrike.
Gjithashtu probleme ka në rrugët rajonale për shkak të rrëshqitjes së dherave dhe gurëve.
Shërbimi meteorologjik ka njoftuar se gjatë ditës së shtunë cikloni do të përfshijë pjesën perëndimore të gadishullit të Peloponezit dhe më pas pjesën qendrore dhe lindore.
Dallgët shumë të larta dhe shirat e rrëmbyer është paralajmëruar se mund të shkaktojnë përmbytje.
Në vazhdim cikloni do të lëvizë drejt ishullit të Kretës dhe atyre të detit Egje, ndërsa më vonë pritet të prekë edhe kryeqytetin Athinë, ku gjatë pasdites së të shtunës parashikohen shtrëngata të fuqishme shiu.
A rrezikon Shqipëria nga cikloni “Zorbas”?
Në një intervistë për Ora News, meterologu Metodi Marku sqaroi se në Greqi dhe Turqi cikloni mund të shkaktoje edhe përmbytje, ndërsa në Shqipëri do të reflektohet vetëm me reshje lokale në zonën juglindore.
Pritet të sjellë shqetësime për Greqinë e jugut dhe Turqinë për arsye të shpejtësive të larta të erës që ajo do të gjenerojë gjatë udhëtimit të saj nëpër këto dy vende. Shpejtësia e erës mund të kalojë për momente të shkurta edhe 150 km/h dhe sasitë e reshjeve sidomos në Peleponez, pra në jug të Greqisë mund të arrijnë dhe mbi 200 mm, që do të thotë se ata pritet të kenë shqetësime nga përmbytjet qoftë edhe të lokalizuara. Për Shqipërinë, në luglindje, në qarkun e Korçës mund të ketë reshje por të dobëta dhe lokalisht mesatare.
Por ndërsa jugu do të përballet me reshje shiu, disa qarqe të vendit rrezikojnë nga zjarret. Më i lartë rreziku paraqitet në Lezhë, Shkodër, Durrës dhe Fier.
Shtatori ka qenë tepër problematik krahasuar me muajt e verës, të cilët ishin pothuasje të qetë. Kjo masë ajri e ftohtë që erdhi në vendin tonë u shoqërua dhe me erë të fortë. Shohim zjarre problematikë dhe matanë kufirit tonë, në Mal të Zi dhe Kroaci. Pjesa më e madhe e territorit do të ketë shqetësime por pjesa më shqetësuese do të mbetet sërish veriu i vendit.
Përgjatë fundjavës temperaturat në të gjithë vendin do të njohin një rritje të lehtë, ndërsa javën e ardhshme pritet rikthimi i reshjeve.
