Komisioni Qendror i Zgjedhjeve vendosi tu heqë mandatin e deputetit Aqif Rakipit dhe Gledion Rehovices pasi preken nga ligji i Dekriminalizimit. KQZ miratoi kërkesën e prokurorisë në mbledhjen e sotme me 5 vota pro. Pro heqjes së mandateve votuan kryetari i KQZ Klement Zguri dhe anëtarët Bledar Skënderi, Denar Biba, Vera Shtjefni dhe Edlira Jorgaqi. Ndërsa Gëzim Veleshnja nga LSI nuk mori pjesë në votim dhe anëtari tjetër i PD, Hysen Osmanaj nuk ishte në mbledhjen e sotme.
Prokuoria, sipas ligjit kërkoi heqjen e mandatit për dy deputetët, që kanë fshehur në formularin e vetëdeklarimit, ndalime nga policia në Itali.
Për deputetin e PDIU-së, Rakipi Interpol Roma thotë se ai është raportuar për vjedhje me emrin Skënder Ejylbegaj. Vjedhja në fjalë ka ndodhur në 03.11.1998, kohë kur deputeti ka deklaruar në formularin e dekriminalizimit se ka qenë emigrant në Itali.
Deputeti i LSI-së, Gledion Rehovica sipas Interpol Romës, është i raportuar për vjedhje dyqani me emrin Kusta Mina në 27.02.1999, kohë kur vetë deputeti ka deklaruar se jetonte në Itali si student.
Përsa i përket rastit të kryebashkiakut të Pogradecit, Kapri KQZ vendosi që t’i drejtohet sërish prokurorisë për informacion shtesë.
