Policia e Korçës ka sekuestruar një sasi mbi gjysmë ton kanabis sativa të fshehur në një banesë. Konkretisht, në fshatin Bulgarec është gjetur 686 kg kanabis sativa.
Policia kishte marrë informacion në portalin “Komisariati Dixhital” për një sasi të madhe droge që fshihej në një banesë.
Pas kontrollit të uniformave blu, në banesën e 45-vjeçarit me iniciale K.G. u gjet droga. Pronari i banesës është shpallur në kërkim nga policia.
Kjo është sasia e dytë e drogës që kapet brenda 24 orëve. Mbrëmjen e djeshme në fshatin Dukaj të Tepelenës policia sekuestroi 600 kg kanabis dhe arrestoi at e bir, Delo e Zeman Kordha.
Njoftimi i policisë:
Më datë 13.02.2018, u referuan materialet në Prokurorinë e Rrethit Gjyqësor Korçë, si dhe u bë shpallja në kërkim e shtetasit K.G, 45 vjeç, banues në fshatin Bulgarec, pasi pas një informacioni të ardhur në portalin Komisariati Dixhital, u ushtrua kontroll në banesën e këtij shtetasi, ku u gjet e sekuestrua me cilësinë e provës materiale 686 kg, bimë e dyshuar Cannabis Sativa.
Po punohet për kapjen e autorit. Neni 283/1 i Kodit Penal.
