Një ngjarje e rëndë ka ndodhur paraditen e sotme në burgun e Shënkollit në Lezhë. Mësohet se një 20-vjeçar, është gjendur i vetëvarur në ambientet e qelisë. Bëhet fjalë për Florian Kodrën nga Thethi i Shkodrës, i cili vuante dënimin në këtë burg. Ai është vetëvarur në dushet e burgut me çarçafë.
Kodra ishte dënuar për “Vrasje të mbetur në tentativë”. Sakaq trupi i pajetë i 20-vjeçarit, është transportuar në morgun e spitalit të Lezhës.
Ngjarja për të cilën u dënua
Florian Kodra ishte dënuar me burgim pas një sherri të ndodhur disa kohë më parë në Theth. Mësohet se ai është konfliktuar me Nazmi Topuzin, 48 vjeç, pasi ky i fundit ishte xheloz për bashkëshorten e tij. Mësohet se 48-vjeçari dyshonte se Kodra i ngacmonte bashkëshorten, dhe kështu ka nisur konflikti.
Burime nga grupi hetimor bënë të ditur se Nazmi Topuzi është zënë në pritë nga i riu, pas një debati që kishin pasur mes tyre për shkaqe xhelozie. Siç mësohet, Florian Kodra kishte shkuar në shtëpinë e të plagosurit për të mjekuar kërthizën nga vjehrra e tij (mjekim popullor).
Nazmi Topuzi, pasi ka mbaruar punën në biznesin familjar që menaxhon në Theth, është kthyer në shtëpi dhe aty ka gjetur të riun.
19-vjeçari është munduar që t’i shpjegojë arsyet se përse kishte shkuar në shtëpinë e tij, por aty ka nisur debati, pasi Nazmi Topuzi është bërë xheloz për gruan e tij, shtetasen D.D., 48 vjeçe, me të cilën, sipas Policisë, jetonte prej 2-3 vitesh.
I riu i ka mohuar akuzat që i ka bërë Nazmi Topuzi për gruan e tij, por ai nuk është bindur dhe i irrituar ka debatuar duke shkuar gati në përleshje mes tyre. Pak ditë pas këtij debati të pasqaruar mes tyre, 19- vjeçari në orët e mëngjesit e ka ruajtur 48- vjeçarin dhe sapo ka dalë në oborrin e shtëpisë së vjehrrit të tij, shtetasit Gjovalin Djerri, e ka qëlluar me katër plumba me armë zjarri automatik.
Topuzi ka marrë dy plumba, duke u plagosur rëndë. Ajo që ka dëshmuar për debatin ka qenë gruaja e të plagosurit. 19-vjeçari e ka pranuar krimin që ka bërë, por nuk ka dhënë arsyet për ngjarjen e ndodhur. Prej 2-3 vitesh Nazmi Topuzi jetonte në Theth te shtëpia e gruas së tij dhe familjarët e saj i kishin dhënë për të menaxhuar një biznes familjar të tyre.
