Një sasi e madhe droge është kapur sot në Fier. Policia bën të ditur se po mbledh në det drogën e hedhur nga trafikantët dhe thotë se bëhen fjalë për 1 ton kanabis sativa.
Operacioni antidrogë ka nisur në mesnatë dhe po vijon ende nga Policia Kufitare Vlorë, Delta Force, Roja Bregdetare, GdF, D.V.P. Vlorë e D.V.P. Fier.
Midis plazhit të Levanit dhe Darëzezës është kapur një velierë me emrin “Nano Nini” me flamur italian, me 2 persona në bord, një italian dhe një shqiptar. Dyshohet se këta skafistë kanë hedhur lëndën narkotike në det pasi kanë parë policinë.
Policia po rikuperon lëndën narkotike dhe deri tani ka mbledhur rreth 90 pako të mëdha. Skafistët janë shoqëruar në Polici për veprime të mëtejshme ndërsa operacion policor po vijon edhe pse kushtet janë të vështirë, me dallgë 5-6 ballë. /Opinion.al
