Portierët shqiptare të Kombëtares kthehen në makthin e sulmuesit të Juves, Dybala. Pasi Berisha i priti penallti në fundin e ndeshjes Aralanta-Juve, sonte eshte Strakosha qe i pret penallti sulmuesit kryesor të Juves. Pritja e Strakoshës në minutat e fundit të ndeshjes i ka dhënë fitoren 1-2 Lacios në fushën e Juves.
Bardhezinjtë e nisën mjaft mirë ndeshjen duke shënuar në minutën e 24 me Douglas Costa, ndërsa patën edhe disa raste të tjera të mira në pjesën e parë, por Strakosha e mbajti në lojë Lazion. Për t’u veçuar është pritja e shkëlqyer e realizuar nga portieri shqiptar e goditjes së Khedira-s.
Ndërkohë, pjesa e dytë ishte një tjetër tablo, që këtë herë i takoi Lazio-s dhe sulmuesit të saj Ciro Immobile, që përmbysën gjithçka.
Vetëm dy minuta pas nisjes së pjesës së dytë, Immobile barazon shifrat. Ende pa e marrë veten nga goli i parë, Buffon shkakton një 11-metërsh, duke ndalur në mënyrë të parregullt brenda zonës Immobilen. Portieri i Juventusit ndëshkohet me të verdhë, ndërsa sulmuesi bardhekaltër e dërgoi më pas për të dytën herë topin në rrjetë, duke realizuar përmbysjen e madhe.
Në fundin e kohës shtesë prej 4 minutash, arbitri akordon një 11-metërsh, pasi përdori sistemin VAR për të rishikuar një ndërhyrje brenda zonës.
Dybala merr përsipër të ekzekutojë penalltinë, por të njëjtën gjë që i bëri Berisha në ndeshjen ndaj Atalanta-s e bën edhe Strakosha duke i pritur argjentinasit penalltinë e dytë në dy ndeshjet e fundit dhe lacialët shpërthejnë në festën mëse legjitime.
